[ad_1]
ಪರಿವಿಡಿ:
ಸಾಮಾನ್ಯ ಅಧ್ಯಯನ ಪತ್ರಿಕೆ 1:
1. ಕುಶಿನಗರ, ಬೌದ್ಧ ಯಾತ್ರಾಸ್ಥಳ.
2. ಮೌಂಟ್ ಹ್ಯಾರಿಯೆಟ್ ನ ಮರುನಾಮಕರಣ.
ಸಾಮಾನ್ಯ ಅಧ್ಯಯನ ಪತ್ರಿಕೆ 2:
1. ಸ್ಪೀಕರ್, ಡೆಪ್ಯೂಟಿ ಸ್ಪೀಕರ್ ಅವರ ಚುನಾವಣೆ.
2. ಗೋವಾದಲ್ಲಿ ಭೂಮಿಪುತ್ರ ಮಸೂದೆ.
3. ‘ಹೊಸ ಕ್ವಾಡ್’ ರೂಪಿಸಲಿರುವ ಯುಎಸ್, ಭಾರತ, ಇಸ್ರೇಲ್ ಮತ್ತು ಯುಎಇ ಗಳು.
ಸಾಮಾನ್ಯ ಅಧ್ಯಯನ ಪತ್ರಿಕೆ 3:
1. ಜೇಮ್ಸ್ ವೆಬ್ ಬಾಹ್ಯಾಕಾಶ ದೂರದರ್ಶಕ.
ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:
1. ನೆಬ್ರಾ ಸ್ಕೈ ಡಿಸ್ಕ್.
2. ಅರ್ಥ್ ಶಾಟ್ ಪ್ರಶಸ್ತಿ.
3. ಭಾಸ್ಕರಬ್ದ.
ಸಾಮಾನ್ಯ ಅಧ್ಯಯನ ಪತ್ರಿಕೆ : 1
ವಿಷಯಗಳು: ಭಾರತೀಯ ಸಂಸ್ಕೃತಿಯು ಪ್ರಾಚೀನ ಕಾಲದಿಂದ ಆಧುನಿಕ ಕಾಲದವರೆಗೆ ಕಲಾ ಪ್ರಕಾರಗಳು, ಸಾಹಿತ್ಯ ಮತ್ತು ವಾಸ್ತುಶಿಲ್ಪದ ಪ್ರಮುಖ ಅಂಶಗಳನ್ನು ಒಳಗೊಂಡಿದೆ.
ಕುಶಿನಗರ, ಬೌದ್ಧ ಯಾತ್ರಾಸ್ಥಳ:
(Kushinagar, a Buddhist pilgrimage town)
ಸಂದರ್ಭ:
ಇತ್ತೀಚೆಗೆ, ಕುಶಿನಗರ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವನ್ನು ಪ್ರಧಾನಿ ನರೇಂದ್ರ ಮೋದಿ ಉದ್ಘಾಟಿಸಿದರು.
- ಪೂರ್ವ ಉತ್ತರಪ್ರದೇಶದಲ್ಲಿರುವ ಈ ವಿಮಾನ ನಿಲ್ದಾಣವು ಸ್ವಲ್ಪ ಸಮಯದ ನಂತರ ಚುನಾವಣೆ ನಡೆಯಲಿರುವ ಉತ್ತರಪ್ರದೇಶ ರಾಜ್ಯದ ಮೂರನೇ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣವಾಗಿದೆ ಮತ್ತು ಇದು ಮುಖ್ಯವಾಗಿ ‘ಬೌದ್ಧ ಪ್ರವಾಸೋದ್ಯಮ ಸರ್ಕ್ಯೂಟ್’ಗಾಗಿ ತನ್ನ ಸೇವೆಗಳನ್ನು ಒದಗಿಸುತ್ತದೆ.
- ಈ ವಿಮಾನ ನಿಲ್ದಾಣದಲ್ಲಿ, ಶ್ರೀಲಂಕಾ ಏರ್‌ಲೈನ್ಸ್ ವಿಮಾನ ಮೊದಲು ಇಳಿಯಿತು, ಈ ವಿಮಾನದ ಮೂಲಕ ‘ಸನ್ಯಾಸಿಗಳು ಮತ್ತು ಇತರ ಗಣ್ಯರು’ ಕುಶಿನಗರವನ್ನು ತಲುಪಿದರು.
ಕುಶಿನಗರದ ಐತಿಹಾಸಿಕ ಮಹತ್ವ:
- ಕುಶಿನಗರವನ್ನು ಎಲ್ಲಾ ಬೌದ್ಧ ಯಾತ್ರಾ ಸ್ಥಳಗಳಲ್ಲಿ ಪ್ರಮುಖವೆಂದು ಪರಿಗಣಿಸಲಾಗಿದೆ, ಈ ಸ್ಥಳದಲ್ಲಿ ಭಗವಾನ್ ಬುದ್ಧನು 483 BC ಯಲ್ಲಿ ಮಹಾಪರಿನಿರ್ವಾಣವನ್ನು (ಅಂತಿಮ ಮೋಕ್ಷ) ಸಾಧಿಸಿದನು.
- ಈಗಿನ ಕುಶಿನಗರವನ್ನು ಪ್ರಾಚೀನ ಮಲ್ಲ ಗಣರಾಜ್ಯದ ರಾಜಧಾನಿಯಾದ ‘ಕುಶಿನಾರ’ ಎಂದು ಗುರುತಿಸಲಾಗಿದೆ. ಕ್ರಿಸ್ತಪೂರ್ವ 6-4ನೇ ಶತಮಾನಗಳಲ್ಲಿದ್ದ, ಆಗಿನ 16 ಮಹಾಜನಪದಗಳಲ್ಲಿ ಮಲ್ಲಾ ಗಣರಾಜ್ಯವು ಒಂದಾಗಿತ್ತು.
- ಮೌರ್ಯರು, ಶುಂಗರು, ಕುಶಾನರು, ಗುಪ್ತರು, ಹರ್ಷವರ್ಧನ ಮತ್ತು ಪಾಲ ಅರಸರು ಕೂಡ ಈ ಪ್ರದೇಶವನ್ನು ಆಳಿದ್ದಾರೆ.
- ‘ಕುಶಿನಗರ’ ದಲ್ಲಿ ಮೊದಲ ಉತ್ಖನನವನ್ನು ‘ಅಲೆಕ್ಸಾಂಡರ್ ಕನ್ನಿಂಗ್‌ಹ್ಯಾಮ್’ ಮತ್ತು ‘ಎಸಿಎಲ್ ಕಾರ್ಲೈಲ್’ (ACL Carlleyle) ನಡೆಸಿದ್ದಾರೆ, ಇದರಲ್ಲಿ ಅವರು 1876 ರಲ್ಲಿ ಮಲಗಿರುವ ಭಂಗಿಯಲ್ಲಿನ 6 ಮೀಟರ್ ಉದ್ದದ ಬುದ್ಧನ ಪ್ರತಿಮೆಯನ್ನು ಮತ್ತು ಮುಖ್ಯ ಸ್ಥೂಪವನ್ನು ಪತ್ತೆ ಮಾಡಿದ್ದರು.
- ಕುಶಿನಗರವು ಬುದ್ಧನನ್ನು ಮಲಗಿರುವಂತೆ ಚಿತ್ರಿಸಿದ ಭಾರತದ ಕೆಲವೇ ಸ್ಥಳಗಳಲ್ಲಿ ಒಂದಾಗಿದೆ.
ಸರ್ಕಾರದ ಈ ಕ್ರಮದ ಮಹತ್ವ:
- ಬೌದ್ಧ ಧರ್ಮವು ಭಾರತದಲ್ಲಿ ಹುಟ್ಟಿಕೊಂಡಿದೆ ಮತ್ತು ಎಂಟು ಪ್ರಮುಖ ಬೌದ್ಧ ಯಾತ್ರಾ ಸ್ಥಳಗಳಲ್ಲಿ ಏಳು ಭಾರತದಲ್ಲಿದ್ದರೂ, ನಮ್ಮ ದೇಶವು ಪ್ರಪಂಚದ ಒಟ್ಟು ಬೌದ್ಧ ಯಾತ್ರಾರ್ಥಿಗಳ ಒಂದು ಶೇಕಡಾವನ್ನು ಸಹ ಸ್ವೀಕರಿಸುವುದಿಲ್ಲ.
- ಪ್ರವಾಸಿಗರು ಕಡಿಮೆ ಸಂಖ್ಯೆಯಲ್ಲಿರುವುದಕ್ಕೆ ಮುಖ್ಯ ಕಾರಣ ಮೂಲಸೌಕರ್ಯಗಳ ಕೊರತೆ ಎಂದು ಸರ್ಕಾರಕ್ಕೆ ತಿಳಿದಿದೆ ಮತ್ತು ಈ ಕಾರಣದಿಂದಾಗಿ, ಪ್ರವಾಸೋದ್ಯಮ ಕ್ಷೇತ್ರದಲ್ಲಿ ಭಾರತವು ಆಗ್ನೇಯ ಏಷ್ಯಾ ದೇಶಗಳಾದ ಇಂಡೋನೇಷ್ಯಾ ಮತ್ತು ಥೈಲ್ಯಾಂಡ್‌ಗಿಂತ ಹಿಂದುಳಿದಿದೆ.
- ಇಂತಹ ‘ವಿಶ್ವ ದರ್ಜೆಯ ಸೌಲಭ್ಯಗಳು’ ಬೌದ್ಧ ಪ್ರವಾಸಿಗರನ್ನು ಭಾರತಕ್ಕೆ ಆಕರ್ಷಿಸುವಲ್ಲಿ ಯಶಸ್ವಿಯಾಗುತ್ತವೆ ಮತ್ತು ಆದಾಯ ಮತ್ತು ಉದ್ಯೋಗ ಸೃಷ್ಟಿಯನ್ನೂ ಹೆಚ್ಚಿಸುತ್ತದೆ ಎಂದು ನಿರೀಕ್ಷಿಸಲಾಗಿದೆ.
ಆದ್ದರಿಂದ, ಸರ್ಕಾರದ ಇತ್ತೀಚಿನ ಈ ಕ್ರಮವು ದೇಶದ ಪ್ರಮುಖ ಬೌದ್ಧ ಯಾತ್ರಾ ಸ್ಥಳಗಳನ್ನು ಉತ್ತೇಜಿಸುವಲ್ಲಿ ಬಹಳ ಸಹಾಯ ಮಾಡುತ್ತದೆ.
‘ಬೌದ್ಧ ಸರ್ಕ್ಯೂಟ್’ ಕುರಿತು:
- ‘ಬೌದ್ಧ ಸರ್ಕ್ಯೂಟ್’ ಯೋಜನೆಯನ್ನು ಕೇಂದ್ರ ಸರ್ಕಾರವು 2016 ರಲ್ಲಿ ಘೋಷಿಸಿತು. ಅಂದಿನಿಂದ, ವಿವಿಧ ಯೋಜನೆಗಳ ಅಡಿಯಲ್ಲಿ, ಈ ಯೋಜನೆಗೆ 343 ಕೋಟಿ ರೂಪಾಯಿಗಳನ್ನು ಮಂಜೂರು ಮಾಡಲಾಗಿದೆ.
- ‘ಬೌದ್ಧ ಸರ್ಕ್ಯೂಟ್’ಬುದ್ಧನ ಜೀವನಕ್ಕೆ ಸಂಬಂಧಿಸಿದ ಪ್ರಮುಖ ಸ್ಥಳಗಳನ್ನು ಸಂಪರ್ಕಿಸುವ ಮಾರ್ಗವಾಗಿದೆ. ಈ ಮಾರ್ಗವು ಬುದ್ಧನ ಜನ್ಮಸ್ಥಳವಾದ ನೇಪಾಳದ ಲುಂಬಿನಿಯಿಂದ, ಜ್ಞಾನೋದಯವನ್ನು ಪಡೆದ ಭಾರತದ ಬಿಹಾರದ ಬೋಧಗಯಾ, ಅವರು ತಮ್ಮ ಮೊದಲ ಧರ್ಮೋಪದೇಶವನ್ನು ನೀಡಿದ ಉತ್ತರಪ್ರದೇಶದ ಸಾರನಾಥ ಮತ್ತು ಅವರು ಮಹಾ-ಪರಿನಿರ್ವಾಣವನ್ನು ಹೊಂದಿದ ಕುಶಿನಗರವನ್ನು ಒಳಗೊಂಡಿದೆ.
ವಿಷಯಗಳು: 18ನೇ ಶತಮಾನದ ಮಧ್ಯಭಾಗದಿಂದ ಇಂದಿನವರೆಗೆ ಆಧುನಿಕ ಭಾರತದ ಇತಿಹಾಸ-ಮಹತ್ವದ ಘಟನೆಗಳು ವ್ಯಕ್ತಿಗಳು ಮತ್ತು ಸಮಸ್ಯೆಗಳು.
ಮೌಂಟ್ ಹ್ಯಾರಿಯೆಟ್ ನ ಮರುನಾಮಕರಣ:
(Mount Harriet renamed after Manipur)
ಸಂದರ್ಭ:
ಇತ್ತೀಚೆಗೆ, ‘ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳ’ ಐತಿಹಾಸಿಕ ಪ್ರವಾಸಿ ತಾಣವಾದ ‘ಮೌಂಟ್ ಹ್ಯಾರಿಯೆಟ್’ ನ (Mount Harriet) ಹೆಸರನ್ನು ಕೇಂದ್ರ ಸರ್ಕಾರವು ‘ಮೌಂಟ್ ಮಣಿಪುರ’ (Mount Manipur) ಎಂದು ಮರುನಾಮಕರಣ ಮಾಡಿದೆ.
‘ಮಣಿಪುರ’ ಮತ್ತು ‘ಮೌಂಟ್ ಹ್ಯಾರಿಯೆಟ್’ ನಡುವಿನ ಸಂಬಂಧವೇನು?
1891 ರ ಆಂಗ್ಲೋ-ಮಣಿಪುರ ಯುದ್ಧ(Anglo-Manipur War)ದಲ್ಲಿ, ಮಹಾರಾಜ ಕುಲಚಂದ್ರ ಧ್ವಜ ಸಿಂಗ್ ಸೇರಿದಂತೆ ಮಣಿಪುರದ ಅನೇಕ ಜನರು ಬ್ರಿಟಿಷರೊಂದಿಗೆ ಹೋರಾಡಿದರು. ಈ ಯುದ್ಧದ ನಂತರ, ಅವರೆಲ್ಲರನ್ನು ಶಿಕ್ಷೆಯ ರೂಪದಲ್ಲಿ ಅಂಡಮಾನ್ ಮತ್ತು ನಿಕೋಬಾರ್‌ನ ಸೆಲ್ಯುಲೂರ್ ಜೈಲಿಗೆ (ಕಾಲಾಪಾನಿ) ಕಳುಹಿಸಲಾಯಿತು.
- ಆದರೆ, ಆ ಹೊತ್ತಿಗೆ ಈ ಜೈಲಿನ ನಿರ್ಮಾಣ ಇನ್ನೂ ಪೂರ್ಣಗೊಂಡಿರಲಿಲ್ಲ, ಈ ಕಾರಣದಿಂದಾಗಿ ಕೈದಿಗಳನ್ನು ‘ಮೌಂಟ್ ಹ್ಯಾರಿಯೆಟ್’ ನಲ್ಲಿ ಇರಿಸಲಾಗಿತ್ತು. ‘ಮೌಂಟ್ ಹ್ಯಾರಿಯೆಟ್’ ಬೆಟ್ಟವು ದಕ್ಷಿಣ ಅಂಡಮಾನ್ ಜಿಲ್ಲೆಯ ಫರ್ಗುಂಜ್ ತಹಸಿಲ್‌ನಲ್ಲಿದೆ.
1891ರ ಆಂಗ್ಲೋ- ಮಣಿಪುರ ಯುದ್ಧಕ್ಕೆ ಕಾರಣಗಳು:
- ಮಣಿಪುರದ ಇತಿಹಾಸದಲ್ಲಿ ಒಂದು ಮಹತ್ವದ ಘಟನೆ ಎಂದು ಪರಿಗಣಿಸಲ್ಪಟ್ಟ ಆಂಗ್ಲೋ- ಮಣಿಪುರ ಯುದ್ಧವು ಮಣಿಪುರ ಸಾಮ್ರಾಜ್ಯ ಮತ್ತು ಬ್ರಿಟಿಷರ ನಡುವೆ 1891 ರಲ್ಲಿ ಒಂದು ತಿಂಗಳು ಕಾಲ ನಡೆಯಿತು.
- ಮತ್ತು ಇದರಲ್ಲಿ, ಬ್ರಿಟಿಷ್ ಸರ್ಕಾರವು ರಾಜಮನೆತನದ ರಾಜಕುಮಾರರ ನಡುವಿನ “ಆಂತರಿಕ ಕಲಹ” ದ ಲಾಭವನ್ನು ಪಡೆದುಕೊಂಡಿತು.
- ಯುದ್ಧದ ಮೊದಲ ಹಂತದಲ್ಲಿ, ಬ್ರಿಟಿಷರು ಶರಣಾಗಬೇಕಾಯಿತು, ಆದರೆ ಎರಡನೇ ಹಂತದಲ್ಲಿ, ಬ್ರಿಟಿಷರು ಮೂರು ಕಡೆಗಳಿಂದ ಇಂಫಾಲದ ಕಾಂಗ್ಲಾ ಕೋಟೆಯ ಮೇಲೆ ದಾಳಿ ಮಾಡುವ ಮೂಲಕ ಮಣಿಪುರವನ್ನು ತಮ್ಮ ಹೊಸ ರಾಜಪ್ರಭುತ್ವದ ರಾಜ್ಯವನ್ನಾಗಿ ಮಾಡಿಕೊಂಡರು.
ಈ ಯುದ್ಧದ ಮಹತ್ವ:
ಅನೇಕರು ಈ ಹೋರಾಟವನ್ನು “ಬ್ರಿಟಿಷ್ ಪ್ರತಿಷ್ಠೆಗೆ ಹೊಡೆತ” ಎಂದು ಬಣ್ಣಿಸಿದ್ದಾರೆ. ಬ್ರಿಟಿಷರು ಯುದ್ಧವನ್ನು ಗೆದ್ದರು, ಆದರೆ ಅವರ ಐದು ಪ್ರಮುಖ ಅಧಿಕಾರಿಗಳು ಈ ಯುದ್ಧದಲ್ಲಿ ಕೊಲ್ಲಲ್ಪಟ್ಟರು.
- ಭಾರತದಲ್ಲಿ, ಈ ಯುದ್ಧವನ್ನು 1857 ರ ದಂಗೆಯ ನಂತರ, ಬ್ರಿಟಿಷ್ ಆಡಳಿತದ ವಿರುದ್ಧದ ಸಾಮಾನ್ಯ ದಂಗೆಯ ಒಂದು ಭಾಗವೆಂದು ಪರಿಗಣಿಸಲಾಗಿದೆ.
- ಈ ಯುದ್ಧದ ನಂತರ, ಮಣಿಪುರವು ಅಧಿಕೃತವಾಗಿ ಬ್ರಿಟಿಷ್ ಸಾರ್ವಭೌಮತ್ವದ ಪರೋಕ್ಷ ಆಳ್ವಿಕೆಗೆ ಒಳಪಟ್ಟ ರಾಜ್ಯವಾಯಿತು.
ಮೌಂಟ್ ಹ್ಯಾರಿಯೆಟ್ ಬಗ್ಗೆ:
- ಮೌಂಟ್ ಹ್ಯಾರಿಯೆಟ್ ಅಂಡಮಾನ್ ಮತ್ತು ನಿಕೋಬಾರ್ ದ್ವೀಪಗಳಲ್ಲಿ ಮೂರನೇ ಅತಿ ಎತ್ತರದ ಶಿಖರವಾಗಿದೆ. ಇದು ಬ್ರಿಟಿಷ್ ರಾಜ್ ಅವಧಿಯಲ್ಲಿ ಮುಖ್ಯ ಆಯುಕ್ತರ (Chief Commissioner) ಬೇಸಿಗೆ ರಾಜಧಾನಿಯಾಗಿತ್ತು.
- ಬ್ರಿಟೀಷ್ ಭಾರತೀಯ ಸೇನೆಯಲ್ಲಿ ಸೇವೆ ಸಲ್ಲಿಸಿದ ಸೈನಿಕ ರಾಬರ್ಟ್ ಕ್ರಿಸ್ಟೋಫರ್ ಟೈಟ್ಲರ್ ಅವರ ಪತ್ನಿಯಾಗಿದ್ದ ಬ್ರಿಟಿಷ್ ಕಲಾವಿದೆ ಮತ್ತು ಛಾಯಾಗ್ರಾಹಕಿ ಹ್ಯಾರಿಯೆಟ್ ಕ್ರಿಸ್ಟಿನಾ ಟೈಟ್ಲರ್ ಅವರ ಹೆಸರನ್ನು ಇದಕ್ಕೆ ಇಡಲಾಗಿದೆ ಎಂದು ನಂಬಲಾಗಿದೆ.
ಸಾಮಾನ್ಯ ಅಧ್ಯಯನ ಪತ್ರಿಕೆ : 2
ವಿಷಯಗಳು: ವಿವಿಧ ಸಾಂವಿಧಾನಿಕ ಹುದ್ದೆಗಳಿಗೆ ನೇಮಕಾತಿ,ವಿವಿಧ ಸಾಂವಿಧಾನಿಕ ಸಂಸ್ಥೆಗಳ ಅಧಿಕಾರಗಳು, ಕಾರ್ಯಗಳು ಮತ್ತು ಜವಾಬ್ದಾರಿಗಳು.
ಸ್ಪೀಕರ್, ಡೆಪ್ಯೂಟಿ ಸ್ಪೀಕರ್ ಅವರ ಚುನಾವಣೆ:
(Electing a Speaker, Deputy Speaker)
ಸಂದರ್ಭ:
ಇತ್ತೀಚೆಗೆ, ಹರ್ಡೋಯ್ ಕ್ಷೇತ್ರದ ಶಾಸಕ, ನಿತಿನ್ ಅಗರ್ವಾಲ್, ಅವರು ಉತ್ತರ ಪ್ರದೇಶ ವಿಧಾನಸಭೆಯ ಉಪ ಸ್ಪೀಕರ್ / ಉಪ ಸಭಾಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ಉತ್ತರ ಪ್ರದೇಶದಲ್ಲಿ ಪ್ರಸ್ತುತ ವಿಧಾನಸಭೆಯ ಅಧಿಕಾರಾವಧಿಯಲ್ಲಿ ಕೇವಲ ಐದು ತಿಂಗಳುಗಳು ಉಳಿದಿದೆ ಎಂಬುದನ್ನು ಗಮನಿಸಬೇಕು.
ಸದನದ ಸ್ಪೀಕರ್ ಮತ್ತು ಉಪ ಸ್ಪೀಕರ್ ಹುದ್ದೆಗೆ ಚುನಾವಣಾ ಪ್ರಕ್ರಿಯೆ:
ಸಂವಿಧಾನದ 93 ನೇ ವಿಧಿ ಅಡಿಯಲ್ಲಿ ಲೋಕಸಭೆ ಮತ್ತು ಆರ್ಟಿಕಲ್ 178 ರ ಅಡಿಯಲ್ಲಿ ರಾಜ್ಯ ಶಾಸಕಾಂಗಗಳಿಗೆ ಸಂಬಂಧಿಸಿದಂತೆ ಮಾಡಲಾದ ನಿಬಂಧನೆಗಳ ಪ್ರಕಾರ, “ಸದನವು ತನ್ನ ಸದಸ್ಯರಲ್ಲಿ ಇಬ್ಬರು ಸದಸ್ಯರನ್ನು ಅದರ ಸ್ಪೀಕರ್ ಮತ್ತು ಉಪ ಸ್ಪೀಕರ್ ಆಗಿ ಆಯ್ಕೆ ಮಾಡಬೇಕಾಗುತ್ತದೆ.
- ಲೋಕಸಭೆ ಮತ್ತು ರಾಜ್ಯ ವಿಧಾನಸಭೆಗಳಲ್ಲಿ, ಅಧ್ಯಕ್ಷರನ್ನು / ರಾಜ್ಯಪಾಲರು ಸ್ಪೀಕರ್ ಅವರನ್ನು ಆಯ್ಕೆ ಮಾಡಲು ದಿನಾಂಕವನ್ನು ನಿಗದಿಪಡಿಸುತ್ತಾರೆ. ಅದರ ನಂತರ, ಚುನಾಯಿತ ಅಧ್ಯಕ್ಷರು ಉಪಾಧ್ಯಕ್ಷರನ್ನು ಆಯ್ಕೆ ಮಾಡುವ ದಿನಾಂಕವನ್ನು ನಿಗದಿಪಡಿಸುತ್ತಾರೆ.
- ಆಯಾ ಸದನಗಳ ಸಂಸದರು/ ಶಾಸಕರು ಈ ಪದವಿಗಳಿಗೆ ತಮ್ಮಲ್ಲಿ ಒಬ್ಬರನ್ನು ಆಯ್ಕೆ ಮಾಡಲು ಮತ ಚಲಾಯಿಸುತ್ತಾರೆ.
ಸಂವಿಧಾನದ ಪ್ರಕಾರ ಸದನದಲ್ಲಿ ‘ಡೆಪ್ಯೂಟಿ ಸ್ಪೀಕರ್’ ಹೊಂದಿರುವುದು ಕಡ್ಡಾಯವೇ?
ಸಾಂವಿಧಾನಿಕ ತಜ್ಞರ ಪ್ರಕಾರ, ಆರ್ಟಿಕಲ್ 93 ಮತ್ತು ಆರ್ಟಿಕಲ್ 178 “ಬೇಕು”(Shall) ಮತ್ತು “ಆದಷ್ಟು ಬೇಗ” (as soon as may be) ಪದಗಳನ್ನು ಬಳಸುತ್ತವೆ, ಇದು ಅಧ್ಯಕ್ಷರು ಮತ್ತು ಉಪಾಧ್ಯಕ್ಷರನ್ನು ಆಯ್ಕೆಮಾಡುವುದು ಕಡ್ಡಾಯ ವಾಗಿರುವುದನ್ನು ಸೂಚಿಸುವುದು ಅಷ್ಟೇ ಅಲ್ಲದೇ, ಅದನ್ನು ಆದಷ್ಟು ಬೇಗ ಮಾಡಬೇಕು ಎಂದು ತೋರಿಸುತ್ತದೆ.
ಅವರ ಪಾತ್ರಗಳು ಮತ್ತು ಕಾರ್ಯಗಳು:
- ಸ್ಪೀಕರ್ “ಸದನದ ಪ್ರಧಾನ ವಕ್ತಾರ, ಅವರು ಅದರ ಸಾಮೂಹಿಕ ಧ್ವನಿಯನ್ನು ಪ್ರತಿನಿಧಿಸುತ್ತಾರೆ ಮತ್ತು ಹೊರಗಿನ ಪ್ರಪಂಚಕ್ಕೆ ಅದರ ಏಕೈಕ ಪ್ರತಿನಿಧಿಯಾಗಿದ್ದಾರೆ”.
- ಸದನದ ನಡಾವಳಿ ಮತ್ತು ಸಂಸತ್ತಿನ ಉಭಯ ಸದನಗಳ ಜಂಟಿ ಸಭೆಗಳ ಕುರಿತು ಸ್ಪೀಕರ್ ಅಧ್ಯಕ್ಷತೆ ವಹಿಸುತ್ತಾರೆ.
- ಮಸೂದೆ ‘ಹಣಕಾಸು ಮಸೂದೆಯೋ’ ಅಥವಾ ಇಲ್ಲವೋ ಎಂದು ಸ್ಪೀಕರ್ ನಿರ್ಧರಿಸುತ್ತಾರೆ ಮತ್ತು ಅದು ‘ಮನಿ ಬಿಲ್’ ಆಗಿದ್ದರೆ ಅದು ಇತರ ಸದನದ ವ್ಯಾಪ್ತಿಗೆ ಬರುವುದಿಲ್ಲ.
- ಸಾಮಾನ್ಯವಾಗಿ, ಸ್ಪೀಕರ್ ಅವರನ್ನು ಆಡಳಿತ ಪಕ್ಷದಿಂದ ಆಯ್ಕೆ ಮಾಡಲಾಗುತ್ತದೆ. ಆದರೆ, ಕಳೆದ ಕೆಲವು ವರ್ಷಗಳಲ್ಲಿ, ಲೋಕಸಭೆಯ ಉಪ ಸ್ಪೀಕರ್ ವಿಷಯದಲ್ಲಿ ಪರಿಸ್ಥಿತಿ ವಿಭಿನ್ನವಾಗಿದೆ.
- ಸಂವಿಧಾನದಲ್ಲಿ ‘ಲೋಕಸಭಾ ಸ್ಪೀಕರ್’ ಅವರ ಸ್ವಾತಂತ್ರ್ಯ ಮತ್ತು ನಿಷ್ಪಕ್ಷಪಾತವನ್ನು ಖಚಿತಪಡಿಸಿಕೊಳ್ಳಲು, ಅವರ ವೇತನವನ್ನು ‘ಭಾರತದ ಏಕೀಕೃತ ನಿಧಿಯಲ್ಲಿ’ ವಿಧಿಸಲಾಗುತ್ತದೆ ಮತ್ತು ಅದನ್ನು ಸಂಸತ್ತಿನಲ್ಲಿ ಚರ್ಚಿಸಲಾಗುವುದಿಲ್ಲ.
- ಮಸೂದೆಯ ಕುರಿತು ಚರ್ಚಿಸುವಾಗ ಅಥವಾ ಸಾಮಾನ್ಯ ಚರ್ಚೆಯ ಸಮಯದಲ್ಲಿ, ಸಂಸತ್ತಿನ ಸದಸ್ಯರು ಸ್ಪೀಕರ್‌ಗೆ ಮಾತ್ರ ಸಂಬೋಧಿಸಬೇಕಾಗುತ್ತದೆ.
ಅಧಿಕಾರಾವಧಿ ಮತ್ತು ರಾಜೀನಾಮೆ:
ಲೋಕಸಭೆಯ ಸ್ಪೀಕರ್ ನಂತೆ, ಡೆಪ್ಯೂಟಿ ಸ್ಪೀಕರ್ ಕೂಡ ಸದನದ ಅವಧಿ ಪೂರ್ಣಗೊಳ್ಳುವವರೆಗೂ ಅಧಿಕಾರವನ್ನು ಹೊಂದಿರುತ್ತಾರೆ. ಆರ್ಟಿಕಲ್ 94 ರ ಅಡಿಯಲ್ಲಿ (ರಾಜ್ಯ ಶಾಸಕಾಂಗಗಳಿಗೆ ಆರ್ಟಿಕಲ್ 179), ಅವರು ಈ ಕೆಳಗಿನ ಮೂರು ಷರತ್ತುಗಳ ಅಡಿಯಲ್ಲಿ ತಮ್ಮ ಕಚೇರಿಗೆ ರಾಜೀನಾಮೆ ನೀಡಬಹುದು:
- ಅವರು ಸದನದ ಸದಸ್ಯತ್ವದ ಅವಧಿ ಮುಗಿಯುವವರೆಗೆ;
- ಸ್ಪೀಕರ್ ಅವರನ್ನು ಉದ್ದೇಶಿಸಿ ಅವರ ಕೈ ಬರಹದ ರಾಜೀನಾಮೆ ನೀಡುವ ಮೂಲಕ;
- ಲೋಕಸಭೆಯ ಆಗಿನ ಎಲ್ಲ ಸದಸ್ಯರ ಬಹುಮತದಿಂದ ಅಂಗೀಕರಿಸಲ್ಪಟ್ಟ ನಿರ್ಣಯದ ಮೂಲಕ ಅವರನ್ನು ಕಚೇರಿಯಿಂದ ತೆಗೆದುಹಾಕಿದ ಸಂದರ್ಭದಲ್ಲಿ. ಆದರೆ, ಈ ನಿರ್ಣಯವನ್ನು ಅಂಗೀಕರಿಸುವ ಮೊದಲು, ಅವರಿಗೆ 14 ದಿನಗಳ ಮುಂಚಿತವಾಗಿ ನೋಟಿಸ್ ನೀಡುವುದು ಕಡ್ಡಾಯವಾಗಿದೆ.
ಉಪ ಸಭಾಪತಿಯ ಅಧಿಕಾರಗಳು:
ಸದನದ ಸಭೆಯ ಅಧ್ಯಕ್ಷತೆ ವಹಿಸುವಾಗ ‘ಉಪ ಸಭಾಪತಿ’ಗೆ’ ಸ್ಪೀಕರ್’ನಷ್ಟೇ ಅಧಿಕಾರವಿದೆ. ‘ಬಿಸಿನೆಸ್-ಪ್ರೊಸೀಜರ್ ರೂಲ್ಸ್’ ನಲ್ಲಿರುವ ‘ಸ್ಪೀಕರ್’ ಕುರಿತ ಎಲ್ಲಾ ಉಲ್ಲೇಖಗಳನ್ನು ಸದನದ ಅಧ್ಯಕ್ಷತೆ ವಹಿಸುವಾಗ ‘ಉಪಾಧ್ಯಕ್ಷ’ರನ್ನು ಚಾರ್ಮನ ‘ಎಂದು ಪರಿಗಣಿಸಲಾಗುತ್ತದೆ.
ಚುನಾವಣೆ ಯನ್ನು ನಡೆಸಲು ಸಮಯದ ಮಿತಿಯನ್ನು ನಿಗದಿಪಡಿಸಿದ ರಾಜ್ಯಗಳು:
‘ಸದನದ ಸ್ಪೀಕರ್ ಮತ್ತು ಡೆಪ್ಯೂಟಿ ಸ್ಪೀಕರ್’ ಚುನಾವಣೆಗಳ ಸಂವಿಧಾನದಲ್ಲಿ ಯಾವುದೇ ಕಾರ್ಯವಿಧಾನ ಅಥವಾ ಸಮಯ ಮಿತಿಯನ್ನು ನಿಗದಿಪಡಿಸಿಲ್ಲ. ಈ ಹುದ್ದೆಗಳಿಗೆ ಚುನಾವಣೆಯ ನಡಾವಳಿಯನ್ನು ನಿರ್ಧರಿಸುವ ಜವಾಬ್ದಾರಿಯನ್ನು ಶಾಸಕಾಂಗಗಳಿಗೆ ಬಿಡಲಾಗಿದೆ.
ಉದಾಹರಣೆಗೆ, ಹರಿಯಾಣ ಮತ್ತು ಉತ್ತರ ಪ್ರದೇಶ ರಾಜ್ಯಗಳಲ್ಲಿ, ‘ಅಧ್ಯಕ್ಷ ಮತ್ತು ಉಪಾಧ್ಯಕ್ಷ’ ಹುದ್ದೆಗಳ ಚುನಾವಣೆಗೆ ಸಮಯ ಮಿತಿಯನ್ನು ನಿಗದಿಪಡಿಸಲಾಗಿದೆ.
ಹರಿಯಾಣದಲ್ಲಿ:
- ಹರಿಯಾಣ ವಿಧಾನಸಭೆ ಸ್ಪೀಕರ್ ಚುನಾವಣೆ, ಸಾರ್ವತ್ರಿಕ ಚುನಾವಣೆಗಳು ಪೂರ್ಣಗೊಂಡ ನಂತರ ಆದಷ್ಟು ಬೇಗ ನಡೆಯುತ್ತವೆ. ತದನಂತರ, ಇದರ ಏಳು ದಿನಗಳಲ್ಲಿ ಉಪಾಧ್ಯಕ್ಷರನ್ನು ಆಯ್ಕೆ ಮಾಡಲಾಗುತ್ತದೆ.
- ನಿಗದಿಪಡಿಸಿದ ನಿಯಮಗಳ ಪ್ರಕಾರ, ಈ ಹುದ್ದೆಗಳಲ್ಲಿ ಯಾವುದಾದರೂ ಖಾಲಿ ಇದ್ದರೆ, ಶಾಸಕಾಂಗದ ಮುಂದಿನ ಅಧಿವೇಶನದ ಮೊದಲ ಏಳು ದಿನಗಳಲ್ಲಿ ಅದರ ಚುನಾವಣೆ ನಡೆಯಬೇಕು.
ಉತ್ತರ ಪ್ರದೇಶದಲ್ಲಿ:
- ವಿಧಾನಸಭೆಯ ಅವಧಿಯಲ್ಲಿ, ಯಾವುದೇ ಕಾರಣಕ್ಕಾಗಿ ‘ಸ್ಪೀಕರ್’ ಹುದ್ದೆ ಖಾಲಿ ಆಗಿದ್ದರೆ, ಖಾಲಿ ಇರುವ ದಿನಾಂಕದಿಂದ 15 ದಿನಗಳಲ್ಲಿ ಈ ಹುದ್ದೆಗೆ ಚುನಾವಣೆ ನಡೆಸಲು ಸಮಯ ಮಿತಿಯನ್ನು ನಿಗದಿಪಡಿಸಲಾಗಿದೆ.
- ಡೆಪ್ಯೂಟಿ ಸ್ಪೀಕರ್ ವಿಷಯದಲ್ಲಿ, ಮೊದಲ ಚುನಾವಣೆಯ ದಿನಾಂಕವನ್ನು ಸ್ಪೀಕರ್ ನಿರ್ಧರಿಸಬೇಕು ಮತ್ತು ನಂತರದ ಖಾಲಿ ಹುದ್ದೆಗಳನ್ನು ಭರ್ತಿ ಮಾಡಲು 30 ದಿನಗಳನ್ನು ನೀಡಲಾಗುತ್ತದೆ.
ವಿಷಯಗಳು: ಸರ್ಕಾರದ ನೀತಿಗಳು ಮತ್ತು ವಿವಿಧ ಕ್ಷೇತ್ರಗಳಲ್ಲಿನ ಅಭಿವೃದ್ಧಿಯ ಅಡಚಣೆಗಳು ಮತ್ತು ಅವುಗಳ ವಿನ್ಯಾಸ ಮತ್ತು ಅನುಷ್ಠಾನದಿಂದ ಉಂಟಾಗುವ ಸಮಸ್ಯೆಗಳು.
ಗೋವಾದಲ್ಲಿ ಭೂಮಿಪುತ್ರ ಮಸೂದೆ:
(Bhumiputra Bill in Goa)
ಸಂದರ್ಭ:
ಇತ್ತೀಚೆಗೆ, ಗೋವಾ ಮುಖ್ಯಮಂತ್ರಿ ‘ಭೂಮಿಪುತ್ರ ಮಸೂದೆಯನ್ನು’ ರಾಜ್ಯಪಾಲರಿಗೆ ಕಳುಹಿಸುವುದಿಲ್ಲ ಎಂದು ಸ್ಪಷ್ಟಪಡಿಸಿದ್ದಾರೆ.
ಏನಿದು ಪ್ರಕರಣ?
- ‘ಗೋವಾ ಭೂಮಿಪುತ್ರ ಅಧಿಕಾರಿಣಿ ವಿಧೇಯಕ, 2021’(Goa Bhumiputra Adhikarini Bill, 2021) ಅನ್ನು ಜುಲೈ 30 ರಂದು ಗೋವಾ ಶಾಸನಸಭೆಯು ಅಂಗೀಕರಿಸಿತು, ಅಂದಿನಿಂದ ಈ ಮಸೂದೆಯು ರಾಜಕೀಯ ಬಿರುಗಾಳಿಯ ಕೇಂದ್ರವಾಗಿದೆ.
- ವಿಧೇಯಕದ ಉದ್ದೇಶವು, ರಾಜ್ಯದಲ್ಲಿ 30 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ವಾಸಿಸುವ ಯಾವುದೇ ವ್ಯಕ್ತಿಯನ್ನು ‘ಭೂಮಿಪುತ್ರ (ಮಣ್ಣಿನ ಮಗ)’ ಎಂದು ಮಾನ್ಯತೆ ನೀಡಲಾಗುವುದು.ಒಬ್ಬ ವ್ಯಕ್ತಿಯು, 1 ನೇ ಏಪ್ರಿಲ್, 2019 ರ ಮೊದಲು ನಿರ್ಮಿಸಿದ 250 ಚದರ ಮೀಟರ್ ಗಿಂತ ಹೆಚ್ಚಿಲ್ಲದ ವಿಸ್ತೀರ್ಣ ಹೊಂದಿರುವ ತನ್ನ ಮನೆಯ ಮೇಲೆ ‘ಒಡೆತನ’ವನ್ನು ಹೊಂದಲು ಹಕ್ಕು ಮಂಡಿಸಬಹುದು.
- ಆದಾಗ್ಯೂ,ಮಸೂದೆಯು ರಾಜ್ಯದ ಬುಡಕಟ್ಟು ಜನರ ಭಾವನೆಗಳಿಗೆ ಧಕ್ಕೆ ತಂದಿದೆ ಎಂದು ಕಾರ್ಯಕರ್ತರು ಹೇಳುತ್ತಾರೆ.
ಮಸೂದೆಯ ಪ್ರಮುಖ ಅಂಶಗಳು:
- ವಿಧೇಯಕದಲ್ಲಿ, ರಾಜ್ಯದಲ್ಲಿ 30 ವರ್ಷ ಅಥವಾ ಅದಕ್ಕಿಂತ ಹೆಚ್ಚು ಕಾಲ ವಾಸಿಸುವ ಯಾವುದೇ ವ್ಯಕ್ತಿಯನ್ನು ‘ಭೂಮಿಪುತ್ರ (ಮಣ್ಣಿನ ಮಗ)’ ಎಂದು ಮಾನ್ಯತೆ ನೀಡಲಾಗುವುದು.
- ಇದರ ಅಡಿಯಲ್ಲಿ, ಒಬ್ಬ ವ್ಯಕ್ತಿಯ ‘ಸಣ್ಣ ನಿವಾಸ’ದ ಮಾಲೀಕತ್ವ ಇದುವರೆಗೆ ಅನಿಶ್ಚಿತವಾಗಿದ್ದರೆ, ಆತನಿಗೆ ಆತನ ನಿವಾಸದ ಹಕ್ಕನ್ನು ನೀಡಲು ಅವಕಾಶವನ್ನು ಒದಗಿಸಲಾಗುತ್ತದೆ.
- ಒಮ್ಮೆ ‘ಭೂಮಿಪುತ್ರ’ (Bhumiputra) ಎಂದು ಗುರುತಿಸಿಕೊಂಡ ನಂತರ, ಒಬ್ಬ ವ್ಯಕ್ತಿಯು, 1 ನೇ ಏಪ್ರಿಲ್, 2019 ರ ಮೊದಲು ನಿರ್ಮಿಸಿದ 250 ಚದರ ಮೀಟರ್ ಗಿಂತ ಹೆಚ್ಚಿಲ್ಲದ ವಿಸ್ತೀರ್ಣ ಹೊಂದಿರುವ ತನ್ನ ಮನೆಯ ಮೇಲೆ ‘ಒಡೆತನ’ವನ್ನು ಹೊಂದಲು ಹಕ್ಕು ಮಂಡಿಸಬಹುದು.
ಅನುಷ್ಠಾನ:
- ಮಸೂದೆಯಲ್ಲಿ ‘ಭೂಮಿಪುತ್ರ ಅಧಿಕಾರಿಣಿ’ ಎಂಬ ಸಮಿತಿಯನ್ನು ರಚಿಸಲು ಅವಕಾಶ ನೀಡಲಾಗಿದೆ. ಸಮಿತಿಯು ಉಪ-ಜಿಲ್ಲಾ ಮ್ಯಾಜಿಸ್ಟ್ರೇಟರ ನೇತೃತ್ವದಲ್ಲಿರುತ್ತದೆ ಮತ್ತು ‘ಪಟ್ಟಣ ಮತ್ತು ದೇಶದ ಯೋಜನೆ’, ‘ಅರಣ್ಯ ಮತ್ತು ಪರಿಸರ ಇಲಾಖೆಗಳು’ ಮತ್ತು ಆಯಾ ತಾಲ್ಲೂಕುಗಳ ಮಮಲತದಾರರನ್ನು ಸಮಿತಿಯ ಸದಸ್ಯರನ್ನಾಗಿ ಒಳಗೊಂಡಿರುತ್ತದೆ.
- ಯಾವುದೇ ಭೂಮಿಪುತ್ರ – ತನ್ನ ಮನೆಯನ್ನು ನಿಗದಿತ ದಿನಾಂಕಕ್ಕಿಂತ ಮೊದಲೇ ನಿರ್ಮಿಸಿದ್ದರೆ – ತನ್ನ ಮನೆಗೆ ಹಕ್ಕುಪತ್ರ ಪಡೆಯಲು ಸಮಿತಿಗೆ ಅರ್ಜಿ ಸಲ್ಲಿಸಬಹುದು.
- ‘ಭೂಮಿಪುತ್ರ ಅಧಿಕಾರಿಣಿ’ ಸಮಿತಿಯಿಂದ ಸಂಬಂಧಪಟ್ಟ ಭೂಮಿಯ ಮಾಲೀಕರಿಗೆ ಆಕ್ಷೇಪಣೆಗಳನ್ನು ಸಲ್ಲಿಸಲು 30 ದಿನಗಳ ಕಾಲಾವಕಾಶ ನೀಡಲಾಗುವುದು – ಇದು ಸ್ಥಳೀಯ ಸಂಸ್ಥೆಯಾಗಿರಬಹುದು ಮತ್ತು ಅದರ ನಂತರ ಸಮಿತಿಯು ಆ ಭೂಮಿಯ ಮಾಲೀಕತ್ವವನ್ನು ‘ಭೂಮಿಪುತ್ರ’ ರಿಗೆ ನೀಡಲು ನಿರ್ಣಯ ಕೈಗೊಳ್ಳುತ್ತದೆ.
- ಭೂಮಿಪುತ್ರ ಅಧಿಕಾರಿಯ ನಿರ್ಧಾರದ ವಿರುದ್ಧ, ಆಡಳಿತಾತ್ಮಕ ನ್ಯಾಯಮಂಡಳಿಯ ಮುಂದೆ 30 ದಿನಗಳಲ್ಲಿ ಮೇಲ್ಮನವಿ ಸಲ್ಲಿಸಬಹುದು.
ಈ ವಿಷಯದಲ್ಲಿ ನ್ಯಾಯಾಲಯದ ಪಾತ್ರ:
ಈ ಕಾಯಿದೆಯಡಿ, ಯಾವುದೇ ನ್ಯಾಯಾಲಯವು “ಭೂಮಿಪುತ್ರ ಅಧಿಕಾರಿ ಮತ್ತು ಆಡಳಿತಾತ್ಮಕ ನ್ಯಾಯಾಧಿಕರಣದಿಂದ ನಿರ್ಧರಿಸಲ್ಪಡುವ ಯಾವುದೇ ಪ್ರಶ್ನೆಯನ್ನು ಪರಿಗಣಿಸಲು, ನಿರ್ಧರಿಸಲು ಅಥವಾ ಇತ್ಯರ್ಥಪಡಿಸಲು” ಅಧಿಕಾರ ವ್ಯಾಪ್ತಿಯನ್ನು ಅಥವಾ ನ್ಯಾಯ ವ್ಯಾಪ್ತಿಯನ್ನು ಹೊಂದಿರುವುದಿಲ್ಲ.
ಈ ಕ್ರಮಗಳ ಅವಶ್ಯಕತೆ:
ಇಂತಹ ಪ್ರಕರಣಗಳು ಕಳೆದ ಹಲವು ವರ್ಷಗಳಿಂದ ಮುಂಚೂಣಿಗೆ ಬರುತ್ತಿವೆ, ಅಲ್ಲಿ ಒಬ್ಬ ವ್ಯಕ್ತಿ ಅಥವಾ ಅವನ ಹೆತ್ತವರು ಮನೆಯನ್ನು ನಿರ್ಮಿಸಿರುತ್ತಾರೆ, ಆದರೆ ಮನೆಯಿರುವ ಭೂಮಿಯು ಅವನ ಹೆಸರಿನಲ್ಲಿರುವುದಿಲ್ಲ. ಈ ಕಾರಣದಿಂದಾಗಿ, ಯಾರೋ ಒಬ್ಬರು ಅವರ ವಿರುದ್ಧ ಪ್ರಕರಣವನ್ನು ದಾಖಲಿಸುತ್ತಾರೆ (ಮಾಲೀಕತ್ವದ ಕುರಿತು) ಎಂಬ ಮನೋವೇದನೆಯ ತೂಗುಗತ್ತಿ ಯಾವಾಗಲೂ ಅವರ ತಲೆಯ ಮೇಲೆ ನೇತಾಡುತ್ತಿರುತ್ತದೆ.
- ಉದ್ದೇಶಿತ ಮಸೂದೆಯ ಉದ್ದೇಶವು, ಒಂದು ಸಣ್ಣ ವಸತಿ ಗೃಹದ ಮಾಲೀಕತ್ವವನ್ನು ಅದರಲ್ಲಿ ವಾಸಿಸುವವರಿಗೆ ನೀಡಬೇಕು, ಇದರಿಂದ ಅವನು ತನ್ನ ಮನೆಯಲ್ಲಿ ಘನತೆ ಮತ್ತು ಸ್ವಾಭಿಮಾನದಿಂದ ಬದುಕಬಹುದು ಮತ್ತು ತನ್ನ ‘ಬದುಕುವ ಹಕ್ಕನ್ನು’ ಚಲಾಯಿಸಲು ಅನುವುಮಾಡಿಕೊಡುತ್ತದೆ.
ಸಂಬಂಧಿತ ಕಾಳಜಿಗಳು:
ಅತಿದೊಡ್ಡ ಕಾಳಜಿಯೆಂದರೆ, ಈ ಮಸೂದೆಯ ಅನುಷ್ಠಾನದ ನಂತರ, ‘ಅಕ್ರಮವಾಗಿ ನಿರ್ಮಿಸಲಾದ ಮನೆಗಳ’ ಸಕ್ರಮಗೊಳಿಸುವಿಕೆಗೆ ಸಂಬಂಧಿಸಿದ ಪ್ರಕರಣಗಳು ಬರಬಹುದು. ಈ ಮಸೂದೆಯೊಂದಿಗೆ, ಗೋವಾದ ಜನನಿಬಿಡ ಪ್ರದೇಶಗಳಲ್ಲಿ ಕಾನೂನುಬಾಹಿರವಾಗಿ ವಾಸಿಸುತ್ತಿರುವ ವಲಸಿಗ ಜನರಿಗೆ ನ್ಯಾಯಸಮ್ಮತತೆಯನ್ನು ಪಡೆಯಲು ಅವಕಾಶ ಒದಗಿಸಬಹುದು ಎಂಬ ಕಾಳಜಿ ಇದೆ.
ವಿಷಯಗಳು: ದ್ವಿಪಕ್ಷೀಯ, ಪ್ರಾದೇಶಿಕ ಮತ್ತು ಜಾಗತಿಕ ಗುಂಪುಗಳು ಮತ್ತು ಭಾರತಕ್ಕೆ ಸಂಬಂಧಿಸಿದ ಒಪ್ಪಂದಗಳು ಮತ್ತು / ಅಥವಾ ಭಾರತದ ಹಿತಾಸಕ್ತಿಗಳ ಮೇಲೆ ಪರಿಣಾಮ ಬೀರುವ ಅಂಶಗಳು.
‘ಹೊಸ ಕ್ವಾಡ್’ ರೂಪಿಸಲಿರುವ ಯುಎಸ್, ಭಾರತ, ಇಸ್ರೇಲ್ ಮತ್ತು ಯುಎಇ ಗಳು:
(US, India, Israel and UAE to form a ‘New Quad’)
ಸಂದರ್ಭ:
ಇತ್ತೀಚೆಗೆ, ಯುಎಸ್, ಭಾರತ, ಇಸ್ರೇಲ್ ಮತ್ತು ಯುನೈಟೆಡ್ ಅರಬ್ ಎಮಿರೇಟ್ಸ್ (ಯುಎಇ) ನ ವಿದೇಶಾಂಗ ಮಂತ್ರಿಗಳ ಮೊದಲ ಶೃಂಗಸಭೆಯು ವರ್ಚುವಲ್ ರೂಪದಲ್ಲಿ ನಡೆಯಿತು.
- ಸಭೆಯ ಕೊನೆಯಲ್ಲಿ, ನಾಲ್ಕು ದೇಶಗಳು “ಅನನ್ಯ ಸಾಮರ್ಥ್ಯಗಳು, ಜ್ಞಾನ ಮತ್ತು ಅನುಭವ” ವನ್ನು ಬಳಸಿಕೊಳ್ಳಲು ಹೊಸ ಅಂತರಾಷ್ಟ್ರೀಯ ಆರ್ಥಿಕ ವೇದಿಕೆಯನ್ನು ರೂಪಿಸಲು ಒಪ್ಪಿಕೊಂಡಿವೆ.
ಹೊಸ ‘ಕ್ವಾಡ್’ ಗುಂಪಿನ ಬಗ್ಗೆ:
ಚತುರ್ಭುಜ ಭದ್ರತಾ ಸಂವಾದದ (Quadrilateral Security Dialogue – QSD) ಮಾದರಿಯಲ್ಲಿ, ಈ ಗುಂಪಿನ,ಔಪಚಾರಿಕ ರಚನೆಯ ಮುಂಚೆಯೇ ಇದನ್ನು ‘ನ್ಯೂ ಕ್ವಾಡ್’ ಅಥವಾ ‘ಮಧ್ಯ-ಪೂರ್ವ ಕ್ವಾಡ್’ (Middle-Eastern Quad) ಎಂದು ಕರೆಯಲಾಗುತ್ತಿದೆ.
‘ಹೊಸ ಕ್ವಾಡ್’ ನ ಉದ್ದೇಶಗಳು ಮತ್ತು ಕೇಂದ್ರೀಕೃತ ಪ್ರದೇಶಗಳು:
ಈ ಗುಂಪಿನ ಉದ್ದೇಶವು “ಅಂತಾರಾಷ್ಟ್ರೀಯ ಆರ್ಥಿಕ ವೇದಿಕೆ” ಯಾಗಿ ಕಾರ್ಯನಿರ್ವಹಿಸುವುದು, ಇದು ನಾಲ್ಕು ಸದಸ್ಯ ರಾಷ್ಟ್ರಗಳ ನಡುವಿನ ಆರ್ಥಿಕ ಮತ್ತು ರಾಜಕೀಯ ಸಂಬಂಧಗಳನ್ನು ಮುನ್ನಡೆಸಲು ಕೆಲಸ ಮಾಡುತ್ತದೆ.
ಪ್ರಾಮುಖ್ಯತೆ:
‘ಮಧ್ಯ-ಪ್ರಾಚ್ಯ’ದಲ್ಲಿ ಸಮತೋಲನ ಮತ್ತು ಸ್ಥಿರತೆಯನ್ನು ಕಾಪಾಡಿಕೊಳ್ಳಲು ಪ್ರಯತ್ನಿಸುತ್ತಿರುವ ದೇಶಗಳ ನಡುವಿನ ಪರಸ್ಪರ ಸಹಕಾರಕ್ಕೆ ಈ ಹೊಸ ಗುಂಪು ಬಹಳ ಮುಖ್ಯವಾಗಿದೆ ಎಂದು ತಜ್ಞರು ನಂಬಿದ್ದಾರೆ.
ಚತುರ್ಭುಜ ಭದ್ರತಾ ಸಂವಾದದೊಂದಿಗೆ (QSD) ಹೋಲಿಕೆ:
ಕ್ವಾಡ್ರಿಲೇಟರಲ್ ಸೆಕ್ಯುರಿಟಿ ಡೈಲಾಗ್ (QSD), ಇದನ್ನು ಸಾಮಾನ್ಯವಾಗಿ ‘ಕ್ವಾಡ್’ ಎಂದು ಕರೆಯಲಾಗುತ್ತದೆ, ಇದು ಯುನೈಟೆಡ್ ಸ್ಟೇಟ್ಸ್, ಭಾರತ, ಜಪಾನ್ ಮತ್ತು ಆಸ್ಟ್ರೇಲಿಯಾ ನಡುವಿನ ‘ಕಾರ್ಯತಂತ್ರದ ಸಂವಾದ’ವಾಗಿದೆ.
- ದಕ್ಷಿಣ ಚೀನಾ ಸಮುದ್ರದಲ್ಲಿ ಹೆಚ್ಚುತ್ತಿರುವ ಚೀನಾದ ಆಕ್ರಮಣಕ್ಕೆ ಪ್ರತಿಕ್ರಿಯೆಯಾಗಿ 2007 ರಲ್ಲಿ ಕಾರ್ಯತಂತ್ರದ ಸಂವಾದವನ್ನು ಆರಂಭಿಸಲಾಯಿತು, ಮತ್ತು ಇದು ಆಧುನಿಕ ಕಾಲದ ಅತಿದೊಡ್ಡ ‘ಜಂಟಿ ಸಮರಾಭ್ಯಾಸ’ ಗಳಲ್ಲಿ ಒಂದಾದ’ ಮಲಬಾರ್ ವ್ಯಾಯಾಮ’ವನ್ನೂ ಒಳಗೊಂಡಿದೆ.
- ಕಳೆದ ಒಂದು ದಶಕದಲ್ಲಿ ಚೀನಾದೊಂದಿಗೆ ಹೆಚ್ಚಿದ ಆರ್ಥಿಕ ಸಂಬಂಧಗಳನ್ನು ಗಮನದಲ್ಲಿಟ್ಟುಕೊಂಡು ಆಸ್ಟ್ರೇಲಿಯಾ ಮಾತುಕತೆಯಿಂದ ಹಿಂದೆ ಸರಿಯಿತು. ಇದರ ನಂತರ, ಈ ‘ಸಂವಾದ ಗ್ರೂಪ್’ ಅನ್ನು 2017 ರಲ್ಲಿ ಮರುಸಂಘಟಿಸಲಾಯಿತು.
‘ನ್ಯೂ ಕ್ವಾಡ್’ ಗುಂಪು ಯಾವುದರ ಮೇಲೆ ಕೇಂದ್ರೀಕರಿಸುತ್ತದೆ?
ಮಾತುಕತೆಯ ಸಮಯದಲ್ಲಿ ಭಾಗವಹಿಸುವ ದೇಶಗಳು ಹೈಲೈಟ್ ಮಾಡಿದ ಕೆಲವು ಕ್ಷೇತ್ರಗಳು ಎಂದರೆ ‘ವ್ಯಾಪಾರ ಸಂಬಂಧಗಳನ್ನು ಸುಧಾರಿಸುವುದು’, ‘ಈ ಪ್ರದೇಶದ ಕಡಲ ಭದ್ರತೆಯಲ್ಲಿ ಸಹಕಾರ’ ಹೆಚ್ಚಿಸುವುದು, ‘ಜಾಗತಿಕ ಸಾರ್ವಜನಿಕ ಆರೋಗ್ಯಕ್ಕಾಗಿ ಜಂಟಿ ಚರ್ಚೆಗಳು’ ಮತ್ತು ‘ಸಾರಿಗೆ ಮತ್ತು ತಂತ್ರಜ್ಞಾನದ ಮೇಲೆ ಕೇಂದ್ರೀಕರಿಸಿದ ಜಂಟಿ ಮೂಲಸೌಕರ್ಯ ಯೋಜನೆಗಳು’ ಸೇರಿವೆ.
ಹೊಸ ಕ್ವಾಡ್‌ನ ಪ್ರಯೋಜನಗಳು:
- ವ್ಯಾಪಾರವನ್ನು ಮೀರಿ, ಭಾರತ, ಯುನೈಟೆಡ್ ಅರಬ್ ಎಮಿರೇಟ್ಸ್ ಮತ್ತು ಇಸ್ರೇಲ್ ಸೆಮಿಕಂಡಕ್ಟರ್ ವಿನ್ಯಾಸ ಮತ್ತು ಉತ್ಪಾದನೆಯಿಂದ ಹಿಡಿದು ಬಾಹ್ಯಾಕಾಶ ತಂತ್ರಜ್ಞಾನದವರೆಗೆ ಅನೇಕ ಕ್ಷೇತ್ರಗಳಲ್ಲಿ ಸಹಯೋಗ ಹೊಂದುವ ನಿರೀಕ್ಷೆಯಿದೆ.
- ಈ ಹೊಸ ಮೈತ್ರಿಯೊಂದಿಗೆ, ಭಾರತವು ಈ ವೇದಿಕೆಯನ್ನು ಬಿಗ್ ಡೇಟಾ, ಕೃತಕ ಬುದ್ಧಿಮತ್ತೆ (ಎಐ), ಕ್ವಾಂಟಮ್ ಕಂಪ್ಯೂಟಿಂಗ್, ತನ್ನ ಉತ್ಪನ್ನಗಳನ್ನು ಇತರ ಸದಸ್ಯ ರಾಷ್ಟ್ರಗಳ ಮಾರುಕಟ್ಟೆಗೆ ರಫ್ತು ಮಾಡುವುದು ಮುಂತಾದ ವಿವಿಧ ಅವಕಾಶಗಳನ್ನು ಬಳಸಿ ಕೊಳ್ಳಬಹುದು.
- ವ್ಯಾಪಾರ, ಇಂಧನ ಮತ್ತು ಪರಿಸರದಂತಹ ಮಿಲಿಟರಿ ಯೇತರ ಸಮಸ್ಯೆಗಳ ಮೇಲೆ ಮತ್ತು ಸಾರ್ವಜನಿಕ ಸರಕುಗಳನ್ನು ಉತ್ತೇಜಿಸಲು ಈ ಗುಂಪು ಸಹಾಯ ಮಾಡುತ್ತದೆ.
- ಭಾರತವು ಈ ಪ್ರದೇಶದಲ್ಲಿ ಸಮಗ್ರ ನಿರ್ದಿಷ್ಟಪಕ್ಷೀಯ ಪಾಲುದಾರಿಕೆಯನ್ನು ರೂಪಿಸಲು ಈ ವೇದಿಕೆಯು ಸಹಾಯ ಮಾಡುತ್ತದೆ. ಫ್ರಾನ್ಸ್, ರಷ್ಯಾ, ಚೀನಾದಂತಹ ಪ್ರಮುಖ ಶಕ್ತಿಗಳು ಈ ಪ್ರದೇಶಕ್ಕೆ ಬರುವುದರಿಂದ, ಈ ಮೈತ್ರಿಯು ಭಾರತವು ಈ ಪ್ರದೇಶದ ಭೌಗೋಳಿಕ ರಾಜಕೀಯವನ್ನು ಬದಲಿಸುವಲ್ಲಿ ತನ್ನ ಸ್ಥಾನವನ್ನು ರೂಪಿಸಿಕೊಳ್ಳಲು ಸಹಾಯ ಮಾಡುತ್ತದೆ.
ಈ ಗುಂಪಿನ ಅಗತ್ಯ ಮತ್ತು ಪ್ರಾಮುಖ್ಯತೆ:
- ಈ ನಾಲ್ಕು ದೇಶಗಳು “ಒಂದು ವಿಶಿಷ್ಟವಾದ ಸಾಮರ್ಥ್ಯಗಳು, ಜ್ಞಾನ ಮತ್ತು ಅನುಭವ” ವನ್ನು ಹೊಂದಿದ್ದು ಅದನ್ನು ಹೊಸ ಸಹಕಾರ ಜಾಲವನ್ನು ನಿರ್ಮಿಸಲು ಬಳಸಬಹುದು.
- ಈ ದೇಶಗಳು ತಮ್ಮ ನಡುವೆ ವಿಶೇಷವಾಗಿ ಇಂಧನ, ಹವಾಮಾನ, ವ್ಯಾಪಾರ ಮತ್ತು ಪ್ರಾದೇಶಿಕ ಭದ್ರತೆಯ ಕ್ಷೇತ್ರಗಳಲ್ಲಿ ಅನೇಕ ಅತಿಕ್ರಮಣ ಹಿತಾಸಕ್ತಿಗಳಿವೆ ಎಂದು ಗುರುತಿಸಿವೆ.
ಆದ್ದರಿಂದ, ಒಟ್ಟಾರೆಯಾಗಿ ‘ಹೊಸ ಕ್ವಾಡ್’ ನ ಈ ಸ್ವರೂಪವು, ಈ ದೇಶಗಳಿಗೆ ಮೇಲೆ ತಿಳಿಸಿದ ಪ್ರದೇಶಗಳನ್ನು ಮತ್ತಷ್ಟು ಅಭಿವೃದ್ಧಿಪಡಿಸಲು ಸಹಾಯ ಮಾಡುತ್ತದೆ.
ಸಾಮಾನ್ಯ ಅಧ್ಯಯನ ಪತ್ರಿಕೆ : 3
ವಿಷಯಗಳು: ಮಾಹಿತಿ ತಂತ್ರಜ್ಞಾನ, ಬಾಹ್ಯಾಕಾಶ, ಕಂಪ್ಯೂಟರ್, ರೊಬೊಟಿಕ್ಸ್, ನ್ಯಾನೊ-ತಂತ್ರಜ್ಞಾನ, ಜೈವಿಕ ತಂತ್ರಜ್ಞಾನ ಮತ್ತು ಬೌದ್ಧಿಕ ಆಸ್ತಿ ಹಕ್ಕುಗಳಿಗೆ ಸಂಬಂಧಿಸಿದ ವಿಷಯಗಳಲ್ಲಿ ಜಾಗೃತಿ.
ಜೇಮ್ಸ್ ವೆಬ್ ಬಾಹ್ಯಾಕಾಶ ದೂರದರ್ಶಕ:
(James Webb Space Telescope)
ಸಂದರ್ಭ:
ಇತ್ತೀಚೆಗೆ, ಎಂಜಿನಿಯರ್‌ಗಳು ಫ್ರೆಂಚ್ ಗಯಾನಾದಲ್ಲಿ ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್ (James Webb Space Telescope – JWST) ಅನ್ನು ಅನ್‌ಬಾಕ್ಸ್ ಮಾಡಿದ್ದಾರೆ ಮತ್ತು ಈಗ ಅದನ್ನು ಉಡಾವಣೆಗೆ ಸಿದ್ಧಗೊಳಿಸುತ್ತಿದ್ದಾರೆ.
- JWST 21 ನೇ ಶತಮಾನದ ಅತ್ಯಂತ ಅದ್ಭುತವಾದ ವೈಜ್ಞಾನಿಕ ಯೋಜನೆಗಳಲ್ಲಿ ಒಂದಾಗಿದೆ, ಮತ್ತು ಇದನ್ನು ಡಿಸೆಂಬರ್ 18 ರಂದು ಕಕ್ಷೆಗೆ ಸೇರಿಸಲಾಗುತ್ತದೆ.
ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್ (JWST) ಬಗ್ಗೆ:
ಜೆಡಬ್ಲ್ಯೂಎಸ್ಟಿ ಅಮೆರಿಕನ್ ಸ್ಪೇಸ್ ಏಜೆನ್ಸಿ (NASA), ಯುರೋಪಿಯನ್ ಸ್ಪೇಸ್ ಏಜೆನ್ಸಿ (European Space Agency) ಮತ್ತು ಕೆನಡಿಯನ್ ಸ್ಪೇಸ್ ಏಜೆನ್ಸಿ (Canadian Space Agency) ಗಳ ಜಂಟಿ ಉಪಕ್ರಮವಾಗಿದೆ.
- ‘ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್’ ಬಾಹ್ಯಾಕಾಶದಲ್ಲಿ ಪರಿಭ್ರಮಿಸುತ್ತಿರುವ ಅವೆಗೆಂಪು ವೀಕ್ಷಣಾಲಯ(Infrared Observatory) ವಾಗಿದ್ದು, ದೀರ್ಘವಾದ ತರಂಗಾಂತರ ವ್ಯಾಪ್ತಿ ಮತ್ತು ಉತ್ತಮವಾದ ಸೂಕ್ಷ್ಮತೆಯನ್ನು ಹೊಂದಿದೆ, ಇದು ‘ಹಬಲ್ ಸ್ಪೇಸ್ ಟೆಲಿಸ್ಕೋಪ್’ (Hubble Space Telescope) ಮತ್ತು ಅದರ ಸಂಶೋಧನೆಗಳನ್ನು ಬೆಂಬಲಿಸುತ್ತದೆ.
- ಮೊದಲು, ಜೆಡಬ್ಲ್ಯೂಎಸ್ಟಿ (JWST)ಯನ್ನು ಎನ್‌ಜಿಎಸ್‌ಟಿ (New Generation Space Telescope – NGST) ಎಂದು ಕರೆಯಲಾಗುತ್ತಿತ್ತು, ನಂತರ 2002 ರಲ್ಲಿ ಇದನ್ನು ಹಿಂದಿನ ನಾಸಾ ಆಡಳಿತಾಧಿಕಾರಿ ‘ಜೇಮ್ಸ್ ವೆಬ್’ ಎಂದು ಮರುನಾಮಕರಣ ಮಾಡಲಾಯಿತು.
- ಇದು 6.5 ಮೀ ಪ್ರಾಥಮಿಕ ದರ್ಪಣವನ್ನು ಹೊಂದಿರುವ ದೊಡ್ಡ ಅತಿಗೆಂಪು ದೂರದರ್ಶಕವಾಗಿರುತ್ತದೆ.
ಟೆಲಿಸ್ಕೋಪ್ ನ ಉದ್ದೇಶ ಮತ್ತು ಕಾರ್ಯಗಳು:
‘ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್’ (JWST) ಅನ್ನು ಬಿಗ್ ಬ್ಯಾಂಗ್ ನಂತರ ರೂಪುಗೊಂಡ ಮೊದಲ ನಕ್ಷತ್ರಗಳು ಮತ್ತು ಗೆಲಕ್ಸಿಗಳನ್ನು ಪತ್ತೆಹಚ್ಚಲು ಮತ್ತು ನಕ್ಷತ್ರಗಳ ಸುತ್ತಲಿನ ಗ್ರಹಗಳ ಪರಿಸರವನ್ನು ಅಧ್ಯಯನ ಮಾಡಲು ನಿರ್ಮಿಸಲಾಗಿದೆ.
- ಈ ದೂರದರ್ಶಕವು ಬ್ರಹ್ಮಾಂಡದ ಆಳವಾದ ಅವಲೋಕನಗಳನ್ನು ಮಾಡುತ್ತದೆ ಮತ್ತು ‘ಹಬಲ್ ಬಾಹ್ಯಾಕಾಶ ದೂರದರ್ಶಕ’ದೊಂದಿಗೆ ಕೆಲಸ ಮಾಡುತ್ತದೆ.
- ಟೆಲಿಸ್ಕೋಪ್ 22 ಮೀಟರ್ (ಟೆನಿಸ್ ಕೋರ್ಟ್ ಗಾತ್ರದ) ಸೋಲಾರ್ ಶೀಲ್ಡ್ / ಸೌರ-ಸುರಕ್ಷಾ ಕವಚ (Sunshield)ಮತ್ತು 6.5 ಮೀಟರ್ ಅಗಲದ ದರ್ಪಣ ಮತ್ತು ಇನ್ಫ್ರಾರೆಡ್ ಸಾಮರ್ಥ್ಯಗಳನ್ನು ಹೊಂದಿರುವ ಉಪಕರಣಗಳನ್ನು ಹೊಂದಿರುತ್ತದೆ.
- ಬ್ರಹ್ಮಾಂಡದ ಈ ‘ಸೆಟ-ಅಪ್’5 ಬಿಲಿಯನ್ ವರ್ಷಗಳ ಹಿಂದೆ ಸಂಭವಿಸಿದ ಬಿಗ್ ಬ್ಯಾಂಗ್ ಘಟನೆಯ ಪರಿಣಾಮವಾಗಿ ರೂಪುಗೊಂಡ ಮೊದಲ ಗೆಲಕ್ಸಿಗಳನ್ನು ನೋಡಲು ಸಾಧ್ಯವಾಗುತ್ತದೆ ಎಂದು ವಿಜ್ಞಾನಿಗಳು ಆಶಿಸಿದ್ದಾರೆ.
ಕಕ್ಷೀಯ ಪರಿಭ್ರಮಣೆ:
- ಹಬಲ್ ಬಾಹ್ಯಾಕಾಶ ದೂರದರ್ಶಕ ಸುಮಾರು 570 ಕಿಮೀ ಎತ್ತರದಲ್ಲಿ ಭೂಮಿಯ ಸುತ್ತ ಸುತ್ತುತ್ತದೆ.
- ‘ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್’ ವಾಸ್ತವವಾಗಿ ಭೂಮಿಯನ್ನು ಸುತ್ತುವುದಿಲ್ಲ, ಬದಲಾಗಿ 1.5 ಮಿಲಿಯನ್ ಕಿಮೀ ದೂರದಲ್ಲಿರುವ ಭೂಮಿ-ಸೂರ್ಯ ಲಾಗ್ ರೇಂಜ್ (Earth-Sun Lagrange Point 2) ಪಾಯಿಂಟ್ 2 ರಲ್ಲಿ ಸ್ಥಾಪಿತ ಗೊಳ್ಳುತ್ತದೆ.
- ಲಾಗ್ರೇಂಜ್ ಪಾಯಿಂಟ್ 2 (L2) ನಲ್ಲಿರುವ ಜೇಮ್ಸ್ ವೆಬ್ ಸ್ಪೇಸ್ ಟೆಲಿಸ್ಕೋಪ್ ನ ಸೋಲಾರ್ ಶೀಲ್ಡ್ ಸೂರ್ಯ, ಭೂಮಿ ಮತ್ತು ಚಂದ್ರನಿಂದ ಬರುವ ಬೆಳಕನ್ನು ತಡೆಯುತ್ತದೆ,ಇದು ಟೆಲಿಸ್ಕೋಪ್ ತಂಪಾಗಿರಲು ಸಹಾಯ ಮಾಡುತ್ತದೆ. ಯಾವುದೇ ‘ಅತಿಗೆಂಪು ದೂರದರ್ಶಕ’ಕ್ಕೆ ತಂಪಾಗಿರುವುದು ಬಹಳ ಮುಖ್ಯ.
ಪೂರ್ವಭಾವಿ ಪರೀಕ್ಷೆಗೆ ಸಂಬಂಧಿಸಿದ ವಿದ್ಯಮಾನಗಳು:
ನೆಬ್ರಾ ಸ್ಕೈ ಡಿಸ್ಕ್:
(Nebra Sky Disc)
- ಲಂಡನ್‌ನಲ್ಲಿರುವ ಬ್ರಿಟಿಷ್ ಮ್ಯೂಸಿಯಂನಲ್ಲಿ ‘ನೆಬ್ರಾ ಸ್ಕೈ ಡಿಸ್ಕ್’ (Nebra Sky Disc) ಎಂಬ ಹೆಸರಿನ ಪುರಾತನ ವಸ್ತು ಪ್ರದರ್ಶನ ನಡೆಯಲಿದೆ. ‘ನೆಬ್ರಾ ಸ್ಕೈ ಡಿಸ್ಕ್’ ಅನ್ನು ನಕ್ಷತ್ರಗಳ ಪ್ರಪಂಚದ ಅತ್ಯಂತ ಹಳೆಯ ನಕ್ಷೆ ಎಂದು ಪರಿಗಣಿಸಲಾಗಿದೆ.
- ನೆಬ್ರಾ ಸ್ಕೈ ಡಿಸ್ಕ್ ಜರ್ಮನಿಯ ನೆಬ್ರಾದಲ್ಲಿ ಎರಡು ಕತ್ತಿಗಳು, ಕೊಡಲಿಗಳು, ಒಂದು ಕಂಚಿನ ಉಳಿ ಮತ್ತು ಎರಡು ಸುರುಳಿಯಾಕಾರದ ತೋಳಿನ ಉಂಗುರಗಳೊಂದಿಗೆ ಹೂಳಲ್ಪಟ್ಟ ಸರಿಸುಮಾರು 3,600 ವರ್ಷಗಳ ಹಳೆಯ ಡಿಸ್ಕ್ ಆಗಿದೆ. ಈ ವಸ್ತುಗಳ ಸಮಾಧಿಯನ್ನು ದೇವರುಗಳಿಗೆ ಸಮರ್ಪಿಸಲಾಗಿದೆ ಎಂದು ನಂಬಲಾಗಿದೆ.
ಅರ್ಥ್ ಶಾಟ್ ಪ್ರಶಸ್ತಿ:
(Earthshot Prize)
ಅರ್ಥ್ ಶಾಟ್ ಪ್ರಶಸ್ತಿಯು (The Earthshot Prize), “ಇಕೋ ಆಸ್ಕರ್” ಎಂದು ಜನಪ್ರಿಯವಾಗಿದೆ, ಇದನ್ನು ಪ್ರಿನ್ಸ್ ವಿಲಿಯಂ ಮತ್ತು ಡ್ಯೂಕ್ ಮತ್ತು ಡಚೆಸ್ ಆಫ್ ಕೇಂಬ್ರಿಡ್ಜ್, ದತ್ತಿ ಸಂಸ್ಥೆ ‘ರಾಯಲ್ ಫೌಂಡೇಶನ್’ ಮತ್ತು ಇತಿಹಾಸಕಾರ ಡೇವಿಡ್ ಅಟೆನ್‌ಬರೋ ಸ್ಥಾಪಿಸಿದ್ದಾರೆ.
- 2021 ಮತ್ತು 2030 ರ ನಡುವೆ, ಹವಾಮಾನ ಬಿಕ್ಕಟ್ಟಿನ ವಿರುದ್ಧ ಹೋರಾಡಲು ಪರಿಹಾರ ಕ್ರಮಗಳನ್ನು ಅಭಿವೃದ್ಧಿಪಡಿಸುವುದಕ್ಕಾಗಿ ಪ್ರತಿವರ್ಷ ಐದು ವ್ಯಕ್ತಿಗಳು/ಸಂಸ್ಥೆಗಳನ್ನು ಈ ಪ್ರಶಸ್ತಿಯಿಂದ ಗೌರವಿಸಲಾಗುತ್ತದೆ.
- ಈ ಪ್ರಶಸ್ತಿಯನ್ನು 2020 ರಲ್ಲಿ ಸ್ಥಾಪಿಸಲಾಯಿತು, 2021 ರಲ್ಲಿ ಮೊದಲ ಬಾರಿಗೆ ಐದು ವ್ಯಕ್ತಿಗಳು / ಸಂಸ್ಥೆಗಳಿಗೆ – ವಿಶ್ವಸಂಸ್ಥೆಯ ಸುಸ್ಥಿರ ಅಭಿವೃದ್ಧಿ ಗುರುಗಳಾದ ಪ್ರಕೃತಿಯ ಪುನಃಸ್ಥಾಪನೆ ಮತ್ತು ಸಂರಕ್ಷಣೆಗಾಗಿ, ವಾಯು ನೈರ್ಮಲ್ಯ, ಸಾಗರ ಪುನರುತ್ಪಾದನೆ, ತ್ಯಾಜ್ಯ ಮುಕ್ತ ಜೀವನ ಮತ್ತು ಹವಾಮಾನ ಕ್ರಿಯೆಗಳಿಗೆ ಇವರುಗಳು ನೀಡಿದ ಕೊಡುಗೆಗಾಗಿ ನೀಡಲಾಗಿದೆ.
- ಭಾರತದ ವಿದ್ಯುತ್ ಮೋಹನ್‌ ರವರ ತಂತ್ರಜ್ಞಾನವನ್ನು ಈ ಪ್ರತಿಷ್ಠಿತ ಪ್ರಶಸ್ತಿ ವಿಜೇತರ ಪಟ್ಟಿಯಲ್ಲಿ ಹೆಸರಿಸಲಾಗಿದೆ. ಅವರ ತಂತ್ರಜ್ಞಾನವು ಕೃಷಿ ತ್ಯಾಜ್ಯವನ್ನು ಮರುಬಳಕೆ ಮಾಡುವ ಮೂಲಕ ಇಂಧನವನ್ನು ತಯಾರಿಸುತ್ತದೆ.
ಪ್ರಶಸ್ತಿಯ ಬಗ್ಗೆ:
ಅರ್ಥ್ ಶಾಟ್ ಪ್ರಶಸ್ತಿ, ಅಮೆರಿಕದ ಮಾಜಿ ಅಧ್ಯಕ್ಷ ಜಾನ್ ಎಫ್. ಜಾನ್ ಎಫ್. ಕೆನಡಿ (John F. Kennedy) ಆರಂಭಿಸಿದ ‘ಮೂನ್ ಶಾಟ್ ಅವಾರ್ಡ್’ (Moonshot Award) ನಿಂದ ಸ್ಫೂರ್ತಿ ಪಡೆದಿದೆ ಇದು ಮಾನವರನ್ನು ಚಂದ್ರನಲ್ಲಿಗೆ ಕಳುಹಿಸುವ ಒಂದು ಗುರಿಯ ಸುತ್ತ ಲಕ್ಷಾಂತರ ಜನರನ್ನು ಒಂದುಗೂಡಿಸಿತು ಮತ್ತು 1960 ರ ದಶಕದಲ್ಲಿ ಹೊಸ ತಂತ್ರಜ್ಞಾನದ ಬೆಳವಣಿಗೆಯನ್ನು ವೇಗವರ್ಧಿಸಿತು.
ಪ್ರಶಸ್ತಿಗಳು ಮತ್ತು ಅರ್ಹತೆ:
- ಭೂಮಿಯ ಸಮಸ್ಯೆಗಳಿಗೆ ಪರಿಣಾಮಕಾರಿ ಪರಿಹಾರಗಳನ್ನು ಪ್ರಸ್ತುತಪಡಿಸುವ ಐದು ವ್ಯಕ್ತಿಗಳು ಅಥವಾ ಸಂಸ್ಥೆಗಳಿಗೆ ಪ್ರತಿ ವರ್ಷ ಒಂದು ಮಿಲಿಯನ್ ಯೂರೋಗಳನ್ನು ನೀಡಲಾಗುತ್ತದೆ.
- ಪ್ರತಿ ವರ್ಷ ಐದು ವಿಜೇತರನ್ನು ಆಯ್ಕೆ ಮಾಡಲಾಗುತ್ತದೆ, ಮತ್ತು ವಿಶ್ವಸಂಸ್ಥೆಯ ‘SDG ಗುರಿಯ ವಿಭಾಗಗಳಲ್ಲಿ’ ತಲಾ ಒಂದನ್ನು ಆಯ್ಕೆ ಮಾಡಲಾಗುತ್ತದೆ, 2030 ರ ವರೆಗೆ ಒಟ್ಟು 50 ಮಿಲಿಯನ್ ಯುರೋ ಗಳನ್ನು ನೀಡಲಾಗುತ್ತದೆ.
ಭಾಸ್ಕರಬ್ದ: (Bhaskarabda)
- ಅಸ್ಸಾಂ ಸರ್ಕಾರದ ಅಧಿಕೃತ ಕ್ಯಾಲೆಂಡರ್‌ನಲ್ಲಿ, ‘ಭಾಸ್ಕರಬ್ದ’ವನ್ನು’ ಶಕ ‘ಮತ್ತು’ ಗ್ರೆಗೋರಿಯನ್ ಯುಗ’ಕ್ಕೆ ಸೇರಿಸಲಾಗುವುದು.
- ಭಾಸ್ಕರಬ್ದ ಒಂದು ‘ಯುಗ’ ವಾಗಿದ್ದು ಇದನ್ನು ಏಳನೆಯ ಶತಮಾನದ ಸ್ಥಳೀಯ ಆಡಳಿತಗಾರನ ಸಿಂಹಾಸನಾರೋಹಣ ದ ದಿನಾಂಕದಿಂದ ಎಣಿಸಲಾಗುತ್ತದೆ.
- ಭಾಸ್ಕರಬ್ದದ ಆರಂಭವನ್ನು ‘ಭಾಸ್ಕರವರ್ಮನ್’ ನು ಕಾಮರುಪ್ ಸಾಮ್ರಾಜ್ಯದ ಸಿಂಹಾಸನವನ್ನೆರಿದ ದಿನಾಂಕದಿಂದ ಪರಿಗಣಿಸಲಾಗಿದೆ. ‘ಭಾಸ್ಕರವರ್ಮನ್’ ಉತ್ತರ ಭಾರತದ ದೊರೆಯಾದ ಹರ್ಷವರ್ಧನನ ಸಮಕಾಲೀನ ಮತ್ತು ರಾಜಕೀಯ ಸಹವರ್ತಿ ಯಾಗಿದ್ದನು.
ಗ್ರೆಗೋರಿಯನ್ vs ಭಾಸ್ಕರಬ್ದ
- ದಿನವು ಮಧ್ಯರಾತ್ರಿಯಲ್ಲಿ ಆರಂಭವಾಗುತ್ತದೆ ಎಂದು ಪರಿಗಣಿಸಲಾಗುವ ಗ್ರೆಗೋರಿಯನ್ ಗಿಂತ ಭಿನ್ನವಾಗಿ, ಅಸ್ಸಾಮಿ ಕ್ಯಾಲೆಂಡರ್ 24 ಗಂಟೆಗಳ ಸಮಯವನ್ನು ಹೊಂದಿದ್ದು ಸೂರ್ಯೋದಯದೊಂದಿಗೆ ಪ್ರಾರಂಭವಾಗುತ್ತದೆ ಮತ್ತು ಕೊನೆಗೊಳ್ಳುತ್ತದೆ.
- ಗ್ರೆಗೋರಿಯನ್ ಕ್ಯಾಲೆಂಡರ್ ಅನ್ನು ‘ಸೌರ ಚಕ್ರ’ದ ಪ್ರಕಾರ ಲೆಕ್ಕ ಹಾಕಲಾಗುತ್ತದೆ, ಆದರೆ ಶಕಾ ಕ್ಯಾಲೆಂಡರ್ ಮತ್ತು ಭಾಸ್ಕರಬ್ದ ಕ್ಯಾಲೆಂಡರ್ ಚಾಂದ್ರಮಾನ ವನ್ನು ಬಳಸುತ್ತದೆ.
- ಭಾಸ್ಕರಬ್ದ ಮತ್ತು ಗ್ರೆಗೋರಿಯನ್ ಕ್ಯಾಲೆಂಡರ್ ನಡುವೆ 593 ವರ್ಷಗಳ ಅಂತರವಿದೆ.
Join our Official Telegram Channel HERE for Motivation and Fast Updates
Subscribe to our YouTube Channel HERE to watch Motivational and New analysis videos
[ad_2]